بعد اسبوع من استعمال الماك
السلام عليكم شباب
أول شي احب اهني نفسي و أهنيكم على العالم اللي تعيشو فيه لأنه فعلاً خلال اسبوع حسيت بالفرق
انا استلمت الجهاز يوم الإثنين اللي فات طبعاً اشتريته من Amazon.com
استلمته في استراحه الغدا و جري على المكتب يعني حتى ما استحملت اني انتظر الين ارجع البيت
استعملته شويه و قفلته و قلبي محروق بس اش نقول أكل العيش مر
المهم من أول يوم استعمال و انا حاس اني شغال على تحفه فنيه مو مجموعه نوافذ بطيئه طبعاً رميت جهازي الشخصي على جنب و إلى اليوم ما اضطريت اشغله غير مرتين و كلها عشان انقل منه ملفات و بس
طبعاً رفعت الرام من ١ جيجا إلى ٢ و نص و لاحظت الفرق في السرعه و الأداء
من أول يوم واجهتني شويه مشاكل منها اني لما اقفل الشاشه الجهاز ينام و هذا الشي بصراحه كان مقرف بالنسبه ليا الحمد لله لقيت له حل بسيط جداً و هوا برنامج
InsomniaX
و برنامج ثاني عشان الشاشه لا تعتم كل شويه اللي هوا كافين
في شويه مشاكل كمان في دعم العربي و هذي المشكل محلوله بالكامل في ويندوز و لينكس بس ماني عارف ليه لسا موجوده في ماك
المشاكل هذي هيا انك لما تكتب كلمه بالانجليزي في وسط كلام عربي راح يخبص عليك كل شي
و كمان في الفايرفوكس الهمزات و المدات اللي تجي وسط الكلام تطلع على شكل علامه استفهام
برنامج نيو افيس بالنسبه لي كان اكثر من كافي و ماني محتاج لا آي وورك ولا أوفيس مبدأياً
تحميل البرامج كان جداً سهل و بصراحه استغربت منه يعني ترمي البرنامج في مجلد البرامج و الف مبروك
حذف البرامج كمان كان أسهل بس اضطريت اني ادور على الطريقه شويه و لقيتها على طول
في شي جداً جداً مضايقني في الكيبورد و هوا عدم وجود ازرار لـ
Home و End
يمكن لأني اتعودت عليهم
حملت برنامج
VMWare Fusion
و حملت عليه الويندوز بس بصراحه شغلته مره وحده و بس و ان شاء الله ما اضطر اشغله بعد كذا بس الاداء كان جداً ممتاز و أبداً ما حسيت ان الجاهز سار اثقل
طيعاً لو حبيت اشرح عن كل ميزه لقيتها ما راح اخلص من كبر النظام حلاوته و سهولته يا ريت اذا احد عنده حل لمشاكل مع العربي يساعدني
و اذا احد عنده أي سؤال أو استفسار انا جاهز
طبعاً انا ما راح اتحمس و اقول اني طلقت الويندوز بالثلاثه بس أقول الله لا يحوجني له
|